Malta hija pajjiż bilingwali u l-Malti u l-Ingliż huma ż-żewġ lingwi uffiċjali li għandhom rwoli prominenti fit-tagħlim tal-lingwi fl-iskejjel. Il-Malti, apparti milli huwa wieħed mill-lingwi uffiċjali, huwa wkoll il-lingwa nazzjonali użata mill-maġġoranza tal-popolazzjoni, bl-Ingliż bħala t-tieni lingwa għall-biċċa l-kbira tan-nies, l-ewwel lingwa għal minoranza sinifikanti tal-popolazzjoni u l-lingwa barranija ewlenija għal għadd dejjem jiżdied ta' migranti mill-UE u mill-bqija tad-dinja. Hemm ukoll għadd ta' lingwi bħall-Franċiż, it-Taljan u l-Ġermaniż, li għandhom l-istatus ta' lingwi ‘barranin’. In-numru ta' siegħat iddedikati lejn it-tagħlim ta' kull lingwa hija riflessjoni ċara tal-istatus li jokkupaw iż-żewġ lingwi uffiċjali minn naħa u l-lingwi barranin min-naħa l-oħra.

It-tagħlim ta' lingwa ġdid jintroduċi lill-istudenti għal diversi kulturi u firxa ta' modi ta' espressjoni u komunikazzjoni ma' kelliema oħra ta' lingwi barranin f'kuntesti differenti. Dan itejjeb ukoll l-iżvilupp tal-litteriżmu kemm fil-lingwa/i uffiċjali kif ukoll fil-lingwa barranija. L-istudju ta' lingwa barranija jinvolvi t-tagħlim dwar kulturi ta' ħaddieħor u b'hekk l-istudenti jsiru ċittadini aktar tolleranti u moħħhom miftuħ u titnaqqas l-etnoċentriċità. Li jkunu jistgħu jikkomunikaw b'mod effettiv kemm bil-lingwi uffiċjali u kif ukoll b'lingwi barranin hija kruċjali għall-iżvilupp tal-ekonomija u tipprovdi liż-żgħażagħ b'opportunitajiet biex itejbu l-impjegabilità tagħhom fin-negozju u d-divertiment permezz ta' ħiliet li jiksbu mit-tagħlim ta' lingwa barranija.

Il-Qafas tal-Kisbiet mit-Tagħlim għal-lingwi uffiċjali u barranin għandu l-għan li jiżgura li l-istudenti kollha jsiru kunfidenti u kompetenti fil-komunikazzjoni ma' kelliema tal-lingwa uffiċjali tagħhom u ta' lingwi oħra barranin.  Meta jitgħallmu l-lingwi uffiċjali, il-ħtieġa li jiżviluppaw l-għarfien ta' metalingwa hija ta' importanza fundamentali. Karatteristika distintiva oħra tat-tagħlim tal-lingwi uffiċjali hija l-komponent tal-litteriżmu. Kemm il-Malti kif ukoll l-Ingliż għandhom komponent letterarju qawwi u l-letteratura u l-lingwa jistgħu jipprovdu interazzjoni dinamika li ssostni t-tagħlim tat-tnejn li huma matul l-edukazzjoni Primarja u Sekondarja. Il-letteratura tgħin lill-istudenti jikbru bħala individwi u membri tal-komunità umana. Barra minn hekk, l-involviment mal-estetika tal-espressjoni lingwistika ssaħħaħ l-għarfien, l-apprezzament u l-użu tal-lingwi uffiċjali tal-istudenti.

Il-lingwi li l-istudenti jitgħallmu l-iskola għandhom ikunu relevanti għall-ħajja preżenti u l-karrieri futuri tagħhom. Huma jipprogredixxu mill-użu ta' lingwaġġ sempliċi ċċentrat fuq sitwazzjonijiet u r-relazzjonijiet personali tagħhom għal strutturi aktar kumplessi tal-lingwa marbuta ma' varjetà ta' suġġetti li jirriflettu s-soċjetà u d-dinja inġenerali u li jistgħu jintużaw f'firxa wiesgħa ta' kuntesti u ma' udjenzi differenti. L-istudenti jitgħallmu l-lingwaġġ tad-deskrizzjoni, in-negozjar, id-diskussjoni, in-narrattiv, ir-rappurtar u l-preżentazzjoni, li jista' jiġi trasferit lejn il-post tax-xogħol wara li jitilqu mill-edukazzjoni obbligatorja. Huma jkunu jistgħu jużaw it-tempi differenti b'aktar preċiżjoni u juru l-ħiliet metakonjittivi tagħhom biex ikunu jistgħu jaraw il-konnessjonijiet bejn il-lingwi u jiżviluppaw il-ħiliet tas-soluzzjoni tal-problemi li jgħinhom jagħmlu aktar sens minn u jkunu kreattivi bil-lingwa. 

L-istudenti jitgħallmu kif jittrasferixxu tagħlim preċedenti għal kuntesti ġodda u kif jindirizzaw l-isfidi tal-komunikazzjoni. L-istudenti jkabbru l-għarfien tal-pronunzja u sistemi tal-lingwa u jkunu kapaċi jidentifikaw xejriet fil-lingwa u l-pronunzja li jistgħu mbagħad jużaw biex jiżviluppaw it-tagħlim tal-lingwa b'mod indipendenti. L-istudenti juru l-progress tagħhom permezz ta' aktar kapaċità u preċiżjoni fl-erba' ħiliet: is-smigħ, it-taħdit, il-qari u l-kitba, hekk kif jiżviluppaw il-kompetenzi tal-komunikazzjoni f'livelli differenti. L-istudenti jkollhom l-opportunità jiżviluppaw riżorsa rikka ta' espressjonijiet lingwistiċi flimkien ma' fehim tal-istrutturi tal-lingwa biex ikunu jistgħu jiksbu kompetenza fil-komunikazzjoni.